ვეფხისტყაოსანი, 1963 წ.

1013. “ჰხედავცა, ჩემო, სოფელი რათა საქმეთა მქმნელია?! რაზომცა ნათობს სინათლე, ჩემთვის ეგრეცა ბნელია. ბრძენნი იცნობენ, სწუნობენ მით, მათგან საწუნელია უშენოდ ჩემი სიცოცხლე, ვაჰმე, რა დიდი ძნელია.

1014. “ჰხედავ, ჩემო, ვით გაგვყარნა სოფელმან და ჟამმან კრულმან, ვეღარ გნახე საყვარელი მხიარული მხიარულმან, ნეტარ რა ქმნას უშენომან გულმან, შენგან დალახვრულმან, გაგიცხადა დამალული გონებამან დაფარულმან.

1015. “შენმან მზემან, აქანამდის შენ ცოცხალ არ მეგონე ჩემი მეთქვა, – გარდასრულდა სიცოცხლე და ყოვლი ღონე! აწ რა მესმა, შემოქმედი ვადიდე და ღმერთსა ვჰმონე, ჩემი ყველა აქანამდის ჭირი ლხინსა შევაწონე.

1016. “შენი სიცოცხლე მეყოფის ჩემად იმედად გულისად,– გულისა ერთობ წყლულისა და ასრე დადაგულისად. – მომიგონებდე, გაჴსოვდე მე, შენთვის დაკარგული სად. – ვზი მზრდელი სიყვარულისა, მის ჩემგან დანერგულისად.

1017. “სხვად, ჩემო, ჩემი ამბავი ჩემგან არ მოგეწერების!– ენა დაშვრების, მოსმენით არვისგან დაიჯერების!– ფატმან წამგვარა გრძნეულთა, –ღმერთიმცა მას ეტერების, აწ კვლა ჰქმნა იგი სოფელმან, რაცა მას შეეფერების.

1018. “აწ სოფელმან უარესი ჭირი ჭირსა მომისართა,– არ დასჯერდა ბედი ჩემი მას პატიჟთა მრავალ-გვართა: კვლაცა მიმცა შესაპყრობლად ქაჯთა, ძნელად საომართა,– ბედმან გვიყო ყველაკაი, ჩემო, რაცა დაგვემართა.

1019. “ციხეს ვზი ეზომ მაღალსა, თვალნი ძლივ გარდასწვდებიან, გზა გვირაბითა შემოვა, მცველნი მუნ ზედა დგებიან, დღისით და ღამით მოყმენი ნობათსა არ დასცდებიან, მათთა შემბმელთა დაჴოცენ, მართ ცეცხლად მოედებიან.

1020. “ნუთუ ესენი გეგონნეს სხვათა მებრძოლთა წესითა?!– ნუცა მე მომკლავ ჭირითა, ამისგან უარესითა! შენ მკვდარსა გნახავ, დავიწვი, ვითა აბედი კვესითა! მოგშორდი, – დამთმე გულითა, კლდისაცა უმაგრესითა.

1021. “შენმან მზემან, უშენოსა არვის მიჰხვდეს მთვარე შენი, შენმან მზემან ვერვის მიჰხვდეს, მოცავიდენ სამნი მზენი აქა თავსა გარდავიქცევ, ახლოს მახლვან დიდნი კლდენი, სული ჩემი შეივედრე, ზეცით მომხვდენ ნუთუ ფრთენი.

1022. “ღმერთსა შემვედრე, ნუთუ კვლა დამჴსნა სოფლისა შრომასა, ცეცხლსა, წყალსა და მიწასა, ჰაერთა თანა ძრომასა მომცნეს ფრთენი და აღვფრინდე, მივჰხვდე მას ჩემსა ნდომასა, დღისით და ღამით ვჰხედვიდე მზისა ელვათა კრთომასა.

1023. “მზე უშენოდ ვერ იქმნების, რათგან შენ ხარ მისი წილი, განაღამცა მას იახელ მისი ეტლი, არ თუ წბილი! მუნა გნახო, მანდვე გსახო, განმინათლო გული ჩრდილი, თუ სიცოცხლე მწარე მქონდა, სიკვდილიმცა მქონდა ტკბილი!

1024. “მე სიკვდილი აღარ მიმძიმს, შემოგვედრებ რათგან სულსა,– მაგრა შენი სიყვარული ჩავიტანე, ჩამრჩა გულსა მომეგონოს მოშორვება, მემატების წყლული წყლულსა,– ნუცა მტირ და ნუცა მიგლოვ, ჩემო,შენთვის დაკარგულსა.

1025. “წადი, ინდოეთს, – მიჰმართე, არგე რა ჩემსა მშობელსა, მტერთაგან შეიწრებულსა, ყოვლგნით ხელ-აღუპყრობელსა, გულსა ალხინე ჩემისა მოშორვებისა მთმობელსა, მომიგონებდი მტირალსა, შენთვის ცრემლ-შეუშრობელსა.

1026. “რაცა ვიჩივლე ბედისა ჩემისა, კმა საჩივარად,– ცან, სამართალი მართალი გულისა გულსა მივა რად. შენთვის მოვკვდები, გავხდები ყორანთა დასაყივარად, ვირე ცოცხალ ვარ, გეყოფი სატირლად და სატკივარად. –

1027. “აჰა, ინიშნე ნიშანი შენეულისა რიდისა, გარდმიკვეთია ალამი, ჩემო, ერთისა კიდისა, ესეღა დაგრჩეს სანაცვლოდ მის იმედისა დიდისა,– რისხვით მობრუნდა ბორბალი ჩვენზედა ცისა შვიდისა!

1028. ესე წიგნი, საყვარელსა მისსა თანა მინაწერი, რა დაწერა, გარდაჰკვეთა მათ რიდეთა ერთი წვერი. თავ-მოხდილსა დაუშვენდა სისხო, სიგრძე, თმათა ფერი,– ალვისაგან სული მოქრის, ყორნის ფრთათათ მონაბერი.

*

1029. იგი მონა წამოვიდა, გულანშაროს მიმავალი, წამ-ერთ მიხდა ფატმანისას, დღე იარა არ მრავალი. – რა ავთანდილს გაუსრულდა საქმე მისი სასურვალი, ჴელ-აპყრობით ღმერთსა ჰმადლობს, ცნობა სრული, არა მთრვალი.

1030. ფატმანს უთხრა: “გამისრულდა ჟამად საქმე საწადელი, დიდი შენი მოჭირვება ჩემგან არის გარდუხდელი, წავალ, დგომად აღარა მცალს, დრო მოსრულა შარშანდელი, ფიცხლად ქაჯეთს მოვიყვანო მათი მომსპობ-ამწყვედელი”.

1031. ხათუნმან უთხრა: “ჰე, ლომო, ცეცხლი აწ უფრო ცხელდების მოეშორვების ნათელსა, გული ამისთვის ბნელდების ისწრაფე, ჩემი ნუ გაგვა, – ხელი ეგრეცა ხელდების!– თუ ქაჯნი მოგესწრებიან, მუნ მისლვა გაგიძნელდების”.