ვეფხისტყაოსანი, 1903 წ.

797. კვლავ მოახსენა ვეზირმან სიტყვა ნაგუშინდელევი, რა გაიგონა, შესთვალა პასუხი არ ნაგრძელევი: “შენ თუ უშმაგო მგონიხარ, ვარმცა ურია მე ლევი, კვლავ ამის მეტად ნუ მასმენ, თვარა მე სრულად გელევი”.

798. რა გამოვიდა ვეზირმან ძებნა, ვერ ჰპოვა მინანი, მართ გაპარვასა უთხრობდეს მონანი ცრემლთა მდინანი. მან სთქვა: “მე დარბაზს ვერ შევალ, მახსოვან დღენი წინანი, ვინცაღა ჰკადრებს, მან ჰკადროს რაცა ვთქვი, მასცა ვინანი”.

799. რა ვეზირი არ შევიდა, კვლავ მეფემან კაცი გზავნის კაცმან ცნის და გარეთ დადგის, წასლვა ვერვინ გაამჟღავნის როსტანს ეჭვი შეუვიდა, ჭმუნვა ამით გაათავნის სთქვა: “უცილოდ გაიპარა, ვინ მარტომან ასთა ავნის”.

800. თავ-დადრეკით იგონებდა, გულსა ჰქონდა ჭმუნვა დიდი, უში ქმნა და აიხედნა, უბრძანებდა მონას: “მიდი, მოვიდეს და აწ მიამბოს, შემოვიდეს იგი ფლიდი”. რა ვეზირი შემობრუნდა, ფერი ჰკრთა და ჰქონდა რიდი.

801. კვლავ შევა დარბაზს ვეზირი დაღრეჯით, არ მხიარულად. მეფემან კითხა: “წასულა მზე დაუდგრომლად, მთვარულად”. მან მოახსენა ყველაი, ვით წასრულიყო ფარულად: “მზე აღარ მზეობს ჩვეთანა, დარი არ დარობს დარულად.

802. რა მეფემან მოისმინა, დაიზახნა მეტის-მეტნი; მოსთქვამს, იტყვის: “ვა, გაზრდილო, ვეღარ გნახვენ თვალნი რეტნი” პირსა ხოკით, წვერსა გლეჯით გააკვირნა მისნი მჭვრეტნი: “სად წაჰხე და სად დაჰკარგენ სინათლისა ეგე სვეტნი,

803. “თუ თავი შენი შენ გახლავს, ღარიბად არ იხსენები; მაგრა მე რა ვქვნა, გაზრდილო, აწ სახლად მმართებს სენები: გამაღარიბე, დამაგდე, გულსა, გლახ, ვისთვის ენები, შენად შეყრამდის პატიჟთა ჩემთა ვერ იტყვის ენები,

804. “ოდეს გნახავ მხიარულსა, ნადირობით შემოსრულსა, ვეღარ გიჭვრეტ ნაბურთალსა, ტანსა მჭევრსა, ჯავარ სრულსა, ვეღარ ვისმენ ხმასა შენსა, სასმენელად მე მახულსა, აწ უშენოდ რაღა ვუყო საჯდომსა და სრასა სრულსა,

805. “ვიცი, არ მოგკლავს შიმშილი, რაზომცა დია ირები, შენ შენი მშვილდი დაგარჩენს, შენთა ისართა პირები. ნუ-თუ კვლავ ღმერთმან წყალობით გაგიადვილოს ჭირები, მაგრა, თუ მოვკვდე, გაზრდილო, ვისგანღა დავიტირები”.

806. ზარი გაისმა, შემოკრბა ჯარი მრავალი კაცისა, დარბაზს ხასთაგან ჯარია ხელითა წვერთა ტაცისა, იგლეჯს და იცემს ყველაი, ხმა ისმის თავსა ტკაცისა; თქვეს: “ბნელი გვმართებს დღე-კრულთა, რადგან მზე მიგვიდრკაცისა”.

807. რა მეფემან დიდებულნი ჰნახა, სულ-თქმით შემოსტირნა; უთხრა: “ხედავთ, მზემან ჩვენმან შუქნი სრულად დაგვიძვირნა; რა ვაწყინეთ, რა შევსცოდეთ, რად დაგვყარნა, რად გაგვწირნა, სპანი, მისგან დაჭირულნი, ვინმცაღა ვით დაგვიჭირნა”.

808. ყოვლნი ტიროდეს, მოთქმიდეს, მერმე დაწყნარდეს გვიანად. მეფემან ჰბრძანა: “იკითხეთ, მარტოა, ანუ ყმიანად”. მოვიდა მონა შერმადინ მოშიშრად, სირცხვილიანად; ანდერძი ჰკადრა, ატირდა, სიცოცხლე უჩნდა ზიანად.

809. მოახსენა: “საწოლს ვპოვე ესე მისგან დანაწერი, დგეს მონანი ნატირებნი, დაეგლიჯა თმა და წვერი, იგი მარტო გაპარულა, ყმა არ ახლავს, არცა ბერი, მე თუ მომკლავთ, მემართლებით, სიცოცხლე მჭირს შეუფერი”.

810. რა ანდერძი წაიკითხეს, კვლავ იტირეს დიდი ხანი; მერმე ჰბრძანა: “მხიარულსა ნუ ჩაიცმენ ჩემნი სპანი, ვამლოცველნეთ დავრდომილნი, ობოლნი და ქვრივნი სხვანი, შეველწივნეთ, მშვიდობისა ნუ-თუ ღმერთმან მისცეს გზანი”.

წასლვა ავთანდილისაგან მეორეთ გაპარვით და ტარიელის შეყრა

811. მთვარე მზესა მოეშოროს, მოშორება განანათლებს, რა იახლოს, შუქი დასწვავს, გაეყრების, ვერ იახლებს, მაგრა ვარდსა უმზეობა გაახმობს და ფერსა აკლებს, ჩვენ ვერ-ჭვრეტა საყვარლისა ჭირსა ძველსა გაგვიახლებს.

812. აწყა დავიწყებ ამბავსა, მის ყმისა წამავლობასა: მივა და, მისტირს გულ-მდუღრად, ვერ ვიტყვი ცრემლთა მცრობასა, წამ-წამ მობრუნდის, იაჯდის მისთვის მზისავე მზობასა, უჭვრეტდის, თვალნი ვერ მოხსნის, თუ მოხსნის, მიხდის ცნობასა.

813. რა მიიახლის დაბნედად, ვერ ხელჰყვის დაძრვად ენისად, მაგრა ჰსდის ცრემლი თვალთაგან, მსგავსად დიჯლისა დენისად; ზოგჯერ დაბრუნდის, იჭვრეტდის ღონედ პატიჟთა თმენისად, რა გაემართის, არ იცის, მას თუ არბევდის ცხენი სად.

814. ჰსთქვა: “ჩემო, შენი შორს მყოფი კრულია, ვინცა დაჰსდუმდესს, რადგან შენ დაგრჩა გონება, გული შენკენვე დაბრუნდეს, თვალთა მტირალთა შეხედვა შენივე ჰსწადდეს და უნდეს, ჯობს საყვარელსა მოყვარე რაზომცა დაუძაბუნდეს.

815. “მე რა ვქმნა შენად შეყრამდის, ანუ რას ვეჭვდე ლხენასა. თავსა მოვიკლავ მე, თუცა შენგან არ ვეჭვდე წყენასა; მაგრა შენ გაწყენ ჩემისა არსიცოცოხლისა სმენასა, მოდი და მივსცნე ცოცხალმან თვალნი ცრემლისა დენასა”.